Мэҥэ Хаҥалас улууһун киэн туттуута!

Мэҥэ Хаҥалас улууһун киэн туттуута!
Бэс ыйын 9-11 күннэригэр, Арассыыйаҕа оскуола иннинээҕи үөрэхтээһин сылыгар анаммыт XVII өрөспүүбүлүкэтээҕи «Саха Өрөспүүбүлүкэтин сыл бастыҥ иитээччитэ» күрэх ыытылынна. Уопсайа 25 талааннаах педагог кыттыыны ыллылар.
Биһиги улууспут чиэһин Майатааҕы «Сардаана» оҕо саадын иитээччитэ Сахая Артемьевна дьоһуннаахтык көмүскээтэ. Күрэх уустук тургутуунан буолла: кыттааччылар түөрт түһүмэҕи аастылар — педагогическай дьарыгы, маастар-кылааһы, брифини уонна блиц-турниры.
Үс күрэх түмүгүнэн — Сахая Артемьевна «Саха Өрөспүүбүлүкэтин сыл бастыҥ иитээччитэ» күрэх призёра буолары ситистэ!
Үрдүк ситиһиитинэн эҕэрдэлиибит! Айымньылаах үлэтигэр үрдүктэн үрдүк дабайыылары, саҥаттан саҥа арыйыылары баҕарабыт!